හොල්මන් කතා

33 පියාගේ ආත්මය පුතු මරණයෙන් ගලවා ගනියි 

පළිගැනීමේ සිතුවිල්ල හිතට නැඟුණ විට තම තත්ත්වය හෝ හොඳ නරක කුමක් ද කියා හෝ මිනිසුන්ට සිහිවන්නේ නැත. ඔවුහු තම සිතේ ඇති වූ පළිගැනීමේ චේතනාව කෙසේ හෝ ඉටු කර ගැනීමට විවිධ උපා යොදති. එය ඉටුකර ගැනීමට චණ්්ඩිකම්, නීතිය දේශපාලන බලය ආදී සියලූ මාර්ගවලින් උත්සහ කළත් නොහැකි වූ තැන අවසානයේ ගුප්ත ක‍්‍රමවේද සොයා යන්නට ද මිනිස්සු පෙලඹෙති. හදිහූනියම්, කොඩිවින ආදී ගුප්ත බලවේග මඟින් පළිගැනීම් ද දියුණු සමාජයක පවා ඉවත්ව නොගොසින් ඇත්තේ එබැවිනි.
දකුණු ලක මහ පරිමාණයෙන් තේ වගා කළ පවුල් දෙකක් විය. මොවුහු පාරම්පරික වෛරක්කාරයෝ වූහ. ඇදී ආ මෙම වෛරයට හේතු වී තිබුණේ, ඉඩම් බෙදීමේ දී ඇති වූ ආරවුලකි. එකම පවුලේ අයියා මලෝ වූ විල්සන් හා සැම්සන් ට තම පියාගේ දේපල හිමිවන්නේ පියාගේ මරණයෙන් පසුව ය. එයට හේතුවන්නේ පියා හදිසියේ මිය යෑමයි. එහෙත් පියා ලියා තැබූ අන්තිම කැමැති පත‍්‍රයට අනුව දෙදෙනාට ඉඩ කඩම් බෙදී ගියේ ය.
පවුලේ වැඩිමලා වූ විල්සන් ට අන්තිම කැමැති පත‍්‍රයට අනුව හිමි වූයේ අඩු ඉඩම් ප‍්‍රමාණයකි. එහෙත් පියාට අයත්ව තිබූ අක්කර දහයක පහළොවක කුඩා කඳු ගැටයක අයිති ය හිමි විය යුත්තේ කාටද යන්න අන්තිම කැමැති පත‍්‍රයේ සඳහන්ව නොතිබිණි.
සහෝදරයන් දෙදෙනාගේ විරසකයට පදනම වැටෙන්නේ ද මේ කඳු ගැටයෙනි. ඉඩම් අඩුවෙන් හිමි වූ වැඩිමලා එය තමාට තනිවම හිමි විය යුතු බව කියා සිටියේ ය. සැම්සන් එයට එකඟ වූයේ නැත. ඔහුට ද එම කන්දෙන් අඩක් අවශ්‍ය විය. පර්චස් එක්දහස් එකසිය අතහරින්නට ඔහුට හිත දුන්නේ නැත. උපන්දා සිටම ව්‍යාපාරික පවුලක හැදී වැඩුණු දෙදෙනාටම තේ අක්කරයකින් ලැබිය හැකි ආදායම ගැන තිබු අවබෝධය නිසාම ඔවුන් තම තමන්ගේ මතවලම එල්බගෙන සිටියේය.
එහි අවසන් ප‍්‍රතිඵලය වූයේ දෙදෙනා ඉඩම් නඩුවකට පැටලීමයි. වසර ගණනාවක් පුරා ඇදීගිය නඩුවේ අවසාන තීන්දුව සැම්සන්ට අවාසිදායක වන බව පෙනෙන්නට විය. එයට හේතු වූයේ විල්සන්ගේ නීතිඥයාගේ දක්ෂතාවයි. ඔහු දිගින් දිගටම කරුණු ඉදිරිපත් කරමින් පියාගේ අවසන් කැමැති පත‍්‍රය ව්‍යාජ එකක් බවට ඔප්පු කිරීමට උත්සහ ගැනීමයි. අවසානයේ පියා සතු සියලූ ඉඩම් දෙකට බෙදීමට සිදු වන බව සැම්සන්ට තේරුම් ගියේ ය.
මේ තීරණය වෙනස් කිරීමට නොහැකි බව දත් සැම්සන් ඊට විසඳුමක් ලෙස තම සහෝදරයා ඝාතනය කිරීමට තීරණය කළේ ය. එහෙත් ඊට තමන් නොගෑවී ඉතා සූක්ෂම ලෙස මෙය ක‍්‍රියාත්මක කළ යුතු බව ද ඔහු දැන සිටියේ ය. වසර 35-40කට පෙර කළුතර ප‍්‍රදේශයේ මැර වැඩවලට නමක් දරා සිටි අයකුට සැම්සන් කොන්ත‍්‍රාත්තුව බාර දුන්නේ ය.
සීතල උඳුවප් මහේ එක් සෙනසුරාදාවක විල්සන් සුපුරුදු ලෙස තම යහළුවන් හමුවී කා බී විනෝද වීමට ටවුමේ වූ සමාජ ශාලාවකට ගියේ ය. සෑම සෙනසුරාදාවකම විල්සන් මෙම ස්ථානයට පැමිණෙන බව සැම්සන් දැන සිටියේ ය. සැම්සන් එම අවස්ථාව ප‍්‍රයෝජනයට ගත්තේ ය.
කළුතර ජිංතු අයියා නම් අයකුට ඔහු කොන්ත‍්‍රාත්තුව භාර දුන්නේ ය. ඔහු ඉතා සුක්ෂම උපායක් සැලසුම් කළේ ය. එදිනද සුපුරුදු පරිදි සිය මොරිස් මයිනර් රථයෙන් විල්සන් සමාජ ශාලාවට පැමිණියේ ය. රාත‍්‍රී හතට පමණ පැමිණෙන විල්සන් යළි එළියට බසින්නේ රාත‍්‍රී එකොළහට පමණ ය. මේ අතරතුර ජිංතු අයියා රැුගෙන කාර්මිකයා ලවා මොරිස් මයිනරයේ බ්රේක් බුරුල් කරන්නට ඔහු කටයුතු කළේ ය. විල්සන්ට ගමන් කිරීමට තිබුණේ කඳු පල්ලම්වලින් ගහන මාර්ගයක ය. සුපුරුදු ලෙස රාත‍්‍රී එකොළහට පමණ විල්සන් පිටතට පැමිණියේ යළි නිවස බලා යාමට ය. මොරිස් මයිනර් රථයේ රියැදුරු අසුනේ වාඩි වූ විල්සන්ට වාහනයේ වෙනසක් දැනුණේ නැත. විල්සන් මාර්ගයේ වංගු සහිත ප‍්‍රදේශයකට පැමිණෙමින් සිටියේ ය. පරිසරයේ පැවැතියේ දැඩි සීතලකි. මීදුමින් කඳු හෙල් වැසී ගොසිණි. මීදුම හා රාත‍්‍රී පින්න හේතුවෙන් විල්සන් තම රථය පැදවූයේ ඉතා කල්පනාවෙනි.විල්සන් වාහනයට නඟින්නට පැමිණෙන විට සිදු වූ සිදුවීමක් පිළිබඳ සිතමින් විල්සන් රිය ධාවනය කළේ ය. ඔහු වාහනය අසලට පැමිණෙන විට සුදු පැහැති සරමකින් සහ කමිසයකින් සැරසුණු වයසක මිනිසකු වාහනය අසල සිටියේ ය. එම පුද්ගලයා වෙනදාටත් එම සමාජශාලාව අසල සිටි බවට විල්සන්ට මතකයක් නැත. විල්සන් වාහනයේ දොර හරිත්ම එම පුද්ගලයා එතනට පැමිණියේ ය.
”මහත්තයා අද මීදුම වැඩියි. මහත්තයා අද නොගිහින් හෙට උදේ යන්න.” විල්සන් ඔහු කී දෑ ගණන් ගත්තේ නැත. ශත පණහේ කාසියක් වයසක මිනිසාට දුන් විල්සන් වාහනය තුළට නැග්ගේය. වයසක මිනිසා තම උත්සහය අතහැරියේ නැත. එවර ඔහු විල්සන්ගේ නමින්ම ඇමතුවේ ය.
”විල්සන් මහත්තයෝ, මහත්තයා එහෙනම් ක්ලිෆඞ් මහත්තයගේ වාහනේ යන්න. ක්ලිෆඞ් මහත්තයත් ඒ පැත්තටම යනවනේ. අනිත් එක දෙනියාය පාරේ කාර් එකක් පෙරළිලා තුන් දෙනෙක් මැරිලා”
විල්සන් වාහනය පණ ගන්වා, එතැනින් නික්ම ආවේ වයසක පුද්ගලයා කි දේවල් ගණන් නොගනිමිනි. ටික දුරක් එත්ම ඔහුගේ මනසේ ප‍්‍රශ්න රැුසක් මතුවන්නට විය. වයසක පුද්ගලයාගේ කටහඬ ඔහුට හොඳට හුරු ය. ඔහු ඒ කටහඬ කාගේදැයි මතක් කර ගැනීමට උත්සහ ගත්තේ ය. වයසක මිනිසා තමාගේ නම දැනගත්තේ කෙසේද? තමා එන විට නොදුටු රිය අනතුරක් පිළිබඳ වයසක මිනිසා දැනගත්තේ කෙසේද? ක්ලිෆඞ් පදිංචි තමාගේ වතු ආසන්නයේ ම බව වයසක මිනිසා දැන ගැනීමද ඔහුට මහත් ගැටලූවක් විය. ක්ලිෆඞ් ද ඒ ප‍්‍රදේශයේ ම සිටි වතු හිමිකරුවෙකි. කඳු හෙල් මාර්ගයට පිවිසීමට ඇත්තේ මීටර් දෙසීයක පමණ දුරකි. මාර්ගයේ වූ වංගුවක් ගනිත්ම සුදු පැහැ ඇඳුමෙන් සැරසී මාර්ගය මැද සිටගෙන සිටිනා පුද්ගලයකුව විල්සන් දුටුවේ ය. මීදුම අතරින් එම ඡුායාව නොසැලී සිටිනු විල්සන් ට පෙනෙන්නට විය. ඔහු තම වාහනයේ නලාව නාඳ කළේ ය. වාහනය ළංවත්ම ඔහු දුටුවේ මාර්ගය මැද සිටගෙන සිටින තම පියාය. ඔහු තදින් තිරිංගය පෑගුවේ ය. වාහනය නතර නොවිණි. ඔහු වාහනය වමට කැපුවේ ය. අසල වූ වැටක කණුවක් කඩාගෙන මාන ගාලක් දිගේ ඉදිරියට ඇදී ගිය වාහනය ගසක වැදී නතර විය. විල්සන්ට කිසිදු තුවාලයක් හෝ සිදු නොවුණි. ඔහු යළි මාර්ගයට පැමිණියේ ය. ඒ තමා දුටු ඡුායාව පිළිබඳ සොයා බැලීමට ය. තමා ඇත්තෙන්ම එවැනි රුවක් දුටුවා ද ? නැතහොත් එය මායාවක් ද? ඒ පියාගේ අවතාරයක් ද?
විල්සන්ට වයසක මිනිසාව යළි සිහියට නැඟුනේ ය. වයසක මිනිසාගේ කටහඬ තම පියාගේ කටහඬට සමාන බව ඔහුට සිතුණි. ක්ලිෆඞ් ගැන දන්නේ ද පියාය. එසේ නම් තමාව යම් අනතුරකින් ගැලවීමට පියා පැමිණියේ ද? මේ පිළිබඳ කිසිවකුට හෝ දැනුම් දීමට ද ඔහුට හැකියාවක් නැති නිසා විල්සන්ට මාර්ගයේ පැයක් පමණ බලා සිටීමට සිදු විය. මේ අතරතුරේ සමාජශාලාවේ සිට පැමිණෙන ක්ලිෆඞ්ගේ වාහනය පැමිණි අතර විල්සන් එහි නැඟී නිවසට පැමිණියේ ය.
සියලූ සිදුවීම්වල සුල මුල එළි වූයේ පසුදිනයේ ය. විල්සන්ගේ වාහනයේ තිරිංග බුරුල් කිරීමට පුද්ගලයන් රැුගෙන ගොස් ඇත්තේ සැම්සන්ගේ ෆෝඞ් රථයෙනි. තිරිංග බුරුල් කිරීමෙන් පසු සැම්සන් ඇතුළු පිරිස මත්පැන් බෝතලයක් ද හිස් කර දමා සැම්සන්ගේ නිවස බලා පිටත්ව ඇත. එහෙත් ඔවුනට නිවසට පැමිණීමට අවස්ථාවක් ලැබුණේ නැත. ඔවුන් ගමන් කළ වාහනය අඩි හාරසියක් පමණ ගැඹුරු ප‍්‍රපාතයකට පෙරළී සැම්සන් ඇතුළු පිරිසගේ මළ සිරුරු සොයා ගත්තේ ඊට පසුදින පෙරවරුවේ ය.
පොලිස් පරීක්ෂණවලට අනුව විල්සන්ගේ වාහනයේ තිරිංග බුරුල් කර තිබූ බවත් ඊට සැම්සන්, පිංතු හා ඔහුගේ සඟයා හවුල් වූ බවටත් කරුණු හෙළි විණි. එහෙත් අවසානයේ ඒ පිරිසටම එහි ප‍්‍රතිවිපාක ලැබුණි.
මේ සියලූ සිදුවීම් තම පියාගේ ආත්මය විසින් කරන ලද්දක් බැව් දැන් විල්සන්ට පැහැදිලි ය. සැම්සන් විවාහකව නොසිටි බැවින් අවසානයේ සියලූ ඉඩකඩම් විල්සන්ට ම හිමි විය.
විල්සන්ගේ පියා තමා අතින් සිදු වූ වරද නිවැරැුදි කිරීමට පැමිණියේ ද, නැතහොත් තම වැඩිමහල් දරුවාගේ ජීවිතය බේරීමට පැමිණියේ ද? සැම්සන් ප‍්‍රපාතයට යවන්නට ඇත්තේත් තමාව බේරූ අයුරින්ම බව සැම්සන්ට සැකයකින් තොරව පිළිගත හැකි ය. එහි සැක කරන්නටද දෙයක් ඉතිරිව නැත.





වෛදික ජ්‍යොතිෂ්‍යවේදී
කාංචන ගීත මනමේන්ද්‍ර
0777964474