හොල්මන් කතා

43 මළයකුන්ට බන්දනයක්

කපුමහතා විශාල පුහුල් ගෙඩියක ඉතා අලංකාර ලෙස මහසෝනාගේ රුව අඳින අතර, ගෝලයකු මල් බුලත් තටුවක් සාදා නිම කළේය. මහසොහොන් රුවෙන් පසු තැඹිලි ගෙඩියක ඊරියකාගේ රුවද අඳිනු ලැබිණි. ඒ දෙකම මල් බුලත් තටුවේ තැබූ කපු මහතා හොඬල අලයක් ගෙන ඉතා සියුම් අයුරින් මිනිස් රුවක් කපන්නට විය.
තරමක විශාල අළු කෙසෙල් අලයක් ගෙන ඉතා සියුම්ව මිනී පෙට්ටියක් සකස් කළ කපු මහතා එයට ගැළපෙන පියනක් ද අළු කෙසෙල් අලයෙන් සැකසීය. එය දිගින් අඩියකට පමණ ආසන්නය. එය මිනීපෙට්ටියකට සෑම අතින්ම සමානය. වත්තේ අටකොණින් හා නිවසේ අටකොණින් ගත් පස් සියුම්ව හලාගැනීමෙන් පසු එයින් අනාගත් මැටිවලින් මිනී පෙට්ටිය තුළ රූපයක් අඹන්නට විය. රූපය අඩක් නිමකර එහි බඩ ප‍්‍රදේශයට බිත්තරයක් තබා රුව සම්පූර්ණ කරන්නට විය. විවර වූ මුවට එහි ලීවලින් කැපූ දත් හා විහිදාගත් නිය සවි කළේය. එය බියජනක පෙනුමක් සහිත මළපෙරේතයාගේ රුවයි. පර මල්වලින් සකසන ලද මල් තටුවක් මත එම මළපෙරේතයා බහාලූ මිනී පෙට්ටිය තැන්පත් කළේය. එය තැබුවේ නිවසේ මුලූතැන්ගෙය තුළය.
නිවසේ ඉදිරිපස තැබූ මල්තටුව අසල වාඩි වූ කපු මහතා එකදිගට පැය කිහිපයක් මතුරන්නට විය. එය අවසන් වූයේ මුලූතැන්ගෙයි තැබූ මළපෙරේතයාගේ මිනී පෙට්ටියට මැතිරීම ඇරැුඹීමත් සමඟය. ඒ අතරතුර ගෝලයෝ විවිධ හැඩවලට ගොක්කොළ, නෙළුම් කොළ සහ කෙහෙල් පට්ටා උපයෝගී කරගනිමින් අෂ්ට බහිරව තටු සමඟම පහන් පැල් හා තටු වර්ග ලොකු කුඩා ප‍්‍රමාණයෙන් විස්සක් පමණ සකස් කළහ. ගොක්කොළ කැටයම්වලින් මෙම තටු අලංකාර වී තිබුණි.
නිවසේ ප‍්‍රධානියා වූ නොයෙල් හා ඔහුගේ බිරින්දෑ කැදවූ කපු මහතා එක් එක් පූජා තටු ඒ ඒ දෙවිවරුන්ට හා මළගිය ආත්මයන්ට කැපකරමින් ඒවායේ පහන් දල්වන ලෙස පැවැසුවේය. ඉන්පසු මිදුලේ සිටුවන ලද කරු තුනක් සහිත රුක් අත්තන ගසක අඩි හතක් පමණ උසින් හත්මාළුව සහිතව සැකැසූ නොඉඳුල් බතක් නොයෙල්ගේ අතින්ම මුට්ටියකට බෙදා සියලූ කැවිලි පලතුරු ඒ තුළටම දමා, දැල්වෙන පන්දමක් මුට්ටිය මැද්දේ ගසා, ගස මත තැබුවේය. ඉන්පසු දෙවියන්ට ආරාධනාකිරීම්, මල් තටු කැපකිරීම් ආදී දේ පැයක පමණ කාලයක් සිදු විය.
තොවිලයේ දෙවැනි අදියර එළැඹියේ රාත‍්‍රී දහය පසුවීමත් සමඟය. කපු මහතා මෙතෙක් ඇඳගෙන සිටි සුදු ඇඳුම වෙනුවට පහත රට තොවිල් නැට්ටුවකු සේ රතු පැහැති ඇඳුමකින් සැරසි ඉණට ඔතන ලද කහ පැහැති සායක් වැනි ඇඳුමකින් සැරසී පැමිණියේය. ඔහුගේ කකුල් දෙකේ බැඳ ඇති ගෙජ්ජි හඬින් අන්ධකාරයට තවත් ගුප්ත බවක් එක් කළේය. ප‍්‍රධාන පහන් පැල අසලට පැමිණි කපු මහතා පැන් කොතලයක් අතට ගත්තේය. ඉන්පසු ආරූඪයෙන් මතුරමින් ඒ පැන් නිවසටත්, ඉඩමටත් ඉස්සේය.
රාත‍්‍රී දොළහෙන් පසු යක් බෙර හඬ වැඩි වූ අතරම කුකුළෙකු අතට ගෙන එම කුකුළාව මහසෝනාට කැප කරමින් ආවේශ වී නටන්නට විය. ඔහුගේ ස්වරූපය බැලීමට නොහැකි තරම් භයංකාරය. අතේ ඇති කුකුළා මළකුණක් මෙන් ඒ අතට වැනෙමින් ඔහේ සිටියි. කුකුළාව නෙවිල්ගේ ඔළුව උඩ හා ඔහුගේ බිරියගේ ඔළුව උඩ තැබීමෙන් පසු මහසොහොන් තටුව යටට විසිකර දැමුවේ බිල්ල කැප කිරීමෙන් පසුවය.
ගිනිපන්දම් දෙකක් අතට ගත් කපු මහතා පන්දම් කරකවමින් වේගයෙන් කැරකෙමින් ගේ හැම තැනම අහුමුලූවල දුවමින් ගේ ගින්දරින් පවිත‍්‍ර කරන්නට විය. වරින් වර නිවසේ බිත්ති පරාල වෙත ගිනි පන්දමින් දමා ගැසුවේ කපුවාට පෙනෙන මළගිය ඥාතීන්ට බව ගෝලයා පැවැසුවෙව්ය. අඟපුරා ගින්දර අතුල්ලා ගනිමින් පන්දම කටේ දමමින් කළ දෙය ගිනි මහසෝනාගේ පැමිණීම සනිටුහන් කළේය. නෙළුම් කොළ යොදා ත‍්‍රිකෝණ හැඩයට කෙසෙල් පට්ටාවලින් සකසන ලද අෂ්ට බහිරව තටු නිවස මැද අට දිශාවට අනුව තබා බහිරවයාට සිදුකරන පූජාව ඇරැුඹුවේය. එක් එක් තටුව කැපකරමින් දුම්මල ගසන්නට විය. බහිරව පූජාව අවසන් වීමත් සමඟම සමස්ත පූජාවේ උද්වේගකරම අවස්ථාව උදාවිය. කපු මහතා ආරුඪ විය.
”මැරිච්ච උන් පහක් ඉන්නවා”
”පිරිමි තුනයි, ගෑනු දෙකයි”
”එකෙක් ඇර අනිත් උන්ට පිං ගන්ඩ බෑ. අවුරුදු සිය ගණනක් තිස්සේ ඉන්න දරුණු එකෙකුත් ඉන්නවා. සීමා කරනකොට හිටියේ හතරයි. දැන් තව එකෙක් ඇවිත්”
”මොනවද දෙවියෝ අපි කරන්න  ඕනේ” ගෝලයෙක් විමැසුවේය.
”ගැට ගහලා අයින් කරලා දාපන්. හැබැයි උන් ආවම අවුස්ස ගන්න එපා. ටිකක් අමාරුකාරයෝ තුන් දෙනෙක් ඉන්නවා”
ආරූඪය අවසන් විය. නිවසේ සියලූ කාමරවල දොර රෙදි ගලවා දැමිණ.
”මැරිච්ච අය කපු මහත්තයාගේ ඇඟට ආවම කිසිම කෙනෙක් පේන මානේ ඉන්න එපා. ළඟට ආවොත් අහක බලාගන්න. මුණ දිහා බලන්න එපා.” යකුන් ඇල්ලීම ඇරැුඹීමට කලින් උපදෙස් මාලාවක් නිකුත් විය. එහෙත් නිවසේ රැුස්ව සිටි අය කිසිවෙක් එය ගණන් ගත්තේ නැත. කපුමහතා පෙරේත තටුව අසල වාඩිවී සිට එකවරට නැඟිට්ටේය. පන්දම අතට ගෙන වේගයෙන් මුලූතැන්ගෙය දෙසට ගියේය. වැඩිදුරක් යන්නට ලැබුණේ නැත. කපු මහතාගේ ස්වරූපය වෙනස් විය. විශාල බඩක් සහිතව අමාරුවෙන් ගමන් කරනා මිනිසකුගේ ස්වරූපයක් ඔහු තුළින් දිස්වන්නට විය. ඔහු ගමන් කළේ දෙපසට වැනෙමිනි. මිනිසුන් දෙසට හැරුණු ඔහු පන්දමෙන් දමා ගැසුවේය. එහෙත් එය දොරේ උළුවස්සේ වැදී බිම වැටුණි. ඒ ආසන්නයේ මේසය මත තිබූ විශාල වතුර වීදුරුවක් අතට ගත් මළගිය ආත්මය එයින් වේගයෙන් දමාගැසුවේය. ඉදිරියෙන්ම සිටි තරුණයකුගේ පපුවට වැදුණු වීදුරුව බිම පතිත වී කැබලි වී ගියේය. නිවසේ සියල්ලෝම බයෙන් බිරන්තට්ටුව නිවසේ ගේට්ටුවෙන්ද එළියට දිව ගියහ. නිවස තුළ රැුඳුණේ තරුණයන් කිහිප දෙනකු පමණි. මළගිය ආත්මය නිවසේ පිටුපස දොරෙන් ප‍්‍රධාන ගේට්ටුව අසලට පැමිණෙන්නට විය.
තරමක් විශාල පොල් ගසක් අසලට පැමිණි ඔහු වේගයෙන් ගස සොලවන්නට විය. ගස ගලවා ගත නොහැකි බව තේරුම්ගැනීමෙන් පසුව කඳ මැදින් අල්ලා දෙකට නවන්නට විය. වැඩි වේලාවක් ගතවුයේ නැත. පොල් කඳ දෙකට කැඞී ගියේය. නිවසේ සිටි අය මෙන්ම පාරේ සිටි පිරිස්ද බයෙන් බිරාන්තව කෑගසන්නට වූහ. කඩා වැටුණු ගහේ අතු ඇද කඩා පොල් පිතිවලින් පාරේ සිටි මිනිසුන් වෙත දමා ගසන්නට විය. ආරක්ෂා කර ඇති සීමාවෙන් ඔහුට එළියට පැමිණිය නොහැකි හෙයින්, මිනිසුන්ගේ බිය තරමක් අඩුවිය. අනතුරින් විනාශ වුණු වාහනය තිබුණේද ඒ අසලමය. එතැනට ගිය මළගිය ආත්මය ඒ දෙස බලා මහ හඬින් හිනාවෙන්නට විය. එය මහා බියකරු ක‍්‍රෑර සිනහවකි. තමා කළ දෙය ඔහු රස වින්දේය.
දොළ තටුව අසල සිටි කපුමහතා මැතිරීම ඇරැුඹුවේය. යක් බෙරය නාද වන්නට විය. මළගිය ආත්මය වැහුණු ප‍්‍රධාන කපු මහතා ටිකින් ටික ඒ දෙසට ගමන් කරන්නට විය. එය එක්වරම සිදුවූවේ ද නැත. මඟ දෙපස ඇති සියලූ ගහ කොළන් දෙකට තුනට කඩා දැමුවේය. අවසානයේ හෙමින් හෙමින් ගොස් තටුව අසල වාඩි විය. වාඩි වීමත් සමඟ ප‍්‍රධාන කපුවා තම කෙස් වැටියෙන් අල්ලා තම හිස පෙරේත තටුව තුළට එඹුවේය. ඉනපසු මතුරමින් නූලට යොදා තිබූ ගැටය හිර කළේය.
මෙලෙස මළගිය ආත්ම පහම තටුවට හිර කළේය. පිරිමි ආත්ම ප‍්‍රචණ්ඩ ලෙස හැසිරුණු අතර, ගැහැනු ආත්ම නිවසේ අය සමඟ විස්තර කතා කර එකිනෙකාව අඳුනා ගත්තේය. එක් ගැහැනු ආත්මයක් කුස්සිය මුල්ලේ තමා සැඟවූ අටු කොස් පාර්සලයක් සොයන්නට විය. එසේ සියල්ල අවසන් වුයේ පුහුල, තැඹිලි ගෙඩිය, මිනිස් රුව හා පෙරේත රුව කඩුවෙන් කපා දැමීමෙනි.
සියල්ල නිමාවට පත්වී යැයි සිතූ නොයෙල් දිග සුසුමක් හෙළා දිග ඇඳි පුටුවේ දිගෑදුනේය.


වෛදික ජ්‍යොතිෂ්‍යවේදී
කාංචන ගීත මනමේන්ද්‍ර
0777964474